كتبت : إسراء صلاح الدين
طيب خلينا نرصد جزء صغيز لدور قطر من ايام ثورة يناير لحد النهارده واحنا نعرف ان قطر قالت لمصر كش ملك فمصر كشت
– أنا كشاهد عيان كنت في قلب الميدان ( ميدان التحرير ) أيام الثورة .. وشوفت الجزيرة العميلة وهي بتنقل الحقيقة والمراسلين بتوعها في قلب الميدان ومنهم اللي اتصاب ومنهم الي اتقتل .. في حين ان دولتنا العميقه المخلصه الوفيه كانت جايبالنا صور النيل والجو جميل والكورنيش العظيم واقليه من مراسلينا اللي كانوا في قلب الميدان وما سمعناش غير عن ٣ او اربعه اللي اتصابوا من المصورين بتوعنا .. وهنا كش ملك يا مصر فكشت مصر
– في ٢٠١٣ وصل مساعدات قطر اللي قد اصغر محافظه في مصر لمصر أم الدنيا وهتبقى قد الدنيا ٤ مليار دولار وده ساند مصر لفتره حلوه كده .. يعني روحنا نشحت وادونا الشحاته وفي الاخر ” هات قرش وانا سيدك ” .. ومن ساعتها قالت لمصر كش ملك فكشت مصر
– ٣٠٠ الف عامل مصري بيشتغل في قطر وبيجي اجازته ولا ملك زمانه ويعمل بيوت ويلبس وينزهه نفسه .. ومحدش يقولي فلوسه من تعبه .. ما جابش ليه فلوسه دي في مصر ؟! .. ده حتى مصر دي امه مش مرات ابوه .. ٧٠٠٠ سنه حجارة وشرب من نيلها برضه ومناخير ابو الهول اللي ما استحملتش يا عيني وانهارت .. وتيجي تقوله اقعد في بلدك واشتغل واكسب .. يجرب فيصرف اللي جابه ويرجع يتداين زي بلده بالظبط .. فيرجع لسيده اللي كان بيصرف عليه .. وهنا كش ملك يا مصر فكشت على طول
– السنه اللي فاتت ٧ دول عربيه من ضمنهم السعوديه ومصر والبحرين والامارات عملوا مقاطعة لقطر وانهار اقتصاد قطر .. بعد ٣ أسابيع استعادت قطر نفسها ووقفت على رجليها من غير ما تاخد ريال من صندوق تحيا قطر ولا قرض من البنك الدولي ولا اتبرعولها بالريال الفكه اللي فوق المرتب ولا صبحوا على قطر بريال .. واتحول من اقتصاد منهار الى اقتصاد متضاعف وهنا كش ملك يا كل الدول العربية فكشت ومعاهم مصر
– من كام يوم بقى مندوب مصر في الامم المتحدة هتف تحيا فرنسا وقالك قطر الممول الرئيسي للإرهاب .. طيب ما احنا فوضنا سيادته للقضاء على الارهاب .. ولسه الارهاب موجود .. والمسيحيين بيخلصوا من وسطنا باسم الفتنه والارهاب .. والسباب بتتاخد من بيتها من الدار للنار .. امنع سعادتك التمويل الخارجي ده واقضي على الارهاب .. قالك لا ازاي .. دي فلوس وجايلنا هنقولها لأ ؟ .. وبعد التصويت من مصرنا الحبيبه لفرنسا ضد قطر وهتافها لفونسا ضد قطر .. رد المندوب القطري تحيا مصر وتحيا قطر وتحيا الدول العربية .. وهنا كش ملك يا مصر فكشت
اصل قطر بتتدخل في شئوننا الداخليه وبتمول الارهاب وانريكا وفرنسا والمانيا ودول اوروبا حلوين وسكر معانا .. مرهم كده
ولا بيقتلوا فينا من غير محاكمات ولا بيخافوا يدخلونا بلادهم علشان ارهابيين ولا بيتطهدوا المسلمين خاااااااالص
تحيا مصر ٣ مرات
ما تكش ملك بقى يا مصر ولمي الدور
المقال ده مش دفاعاً عن قطر على فكرة بس علشان ما نعيش في وهم 7000 سنه حضارة ونسيب الدنيا كلها تسبقنا في شتى المجالات