بقلم : عمرو نوار
( أنا المصرى )
انا كل طعم وكل لون وكل ملة
أنا كل حارة وكل عشة وكل فيلا
أنا القديم وأنا الجديد ..أنا إللى حامل كل علة
أنا الصليب ..وأنا إللى بأركب م المنيب
وأنا إللى أقوم وأنا إللى أصوم من قبل ماتبان الأهلة
أنا كل طعم وكل لون وكل ملة
أنا الصبور عبدالشكور
وإيمانى مش محتاج أدلة
وأنا الغضوب إبن اللعوب
كافر ..إذا ف صبرى مذلة
أنا الإمام عبدالسلام
وبطريرك ..إذا يهوذا لى تجلى
أنا كل طعم وكل لون وكل ملة
انا التراب ..وانا المطر إذا يحركنى سحاب
عبدالإله المستجاب
لجل النبى ..صاحب الصحاب
حبى بنوره قد تحلى
انا كل طعم وكل لون وكل ملة
انا البداية والنهاية ..والحكاية
وإللى خاننى …خان ما خلى
كل وقت ولى آدان
انا عيونك والودان
وصوتى ناطق ف الميدان
وعمر قلبى ماتخلى
عمر قلبى ماتخلى
انا كل طعم وكل لون وكل ملة
تعليقك على فيس بوك
أنشر تعليقك مباشرة على فيس بوك
