بقلم : عمرو نوار
ياسما هزى الدواير
ألف طز عليه يناير
ياسما إرخى الستاير
مصر جاية بالبشاير
فى مناخها الصيف عجب
والصيام أول رجب
والوطن بقى حرف طاير
ياسما هزى الدواير
ألف طز عليه يناير
إنزلى ف أجدعها دايرة
إنتى عوجة ولا بايرة ؟
ده الحرير مش تقول لى
قال ..حراير ؟؟؟؟
ياسما هزى الدواير
الف طز عليه يناير
بالصاجات ف المضبطة
وإنتى بطة مزغطة
برلماننا يازقططة
مش شاكيرا ..دى شكاير
ياسما هزى الدواير
الف طز عليه يناير
كل (عضو ) هايبقى زايط
والمجاورة بالوسايط
برلمان محتاج له ظابط
للإيقاع يمنع خساير
ياسما هزى الدواير
الف طز عليه يناير
ياسما نقوطك ..وطن
صابه ف جنابه عطن
قد جنى ع اللى فطن
ولمصيره الشعب ساير
ياسما هزى الدواير
ألف طز عليه يناير
سما أنتى أغلى “سرة ”
فوق كتاب تاريخنا مرة
ياسما لو أمة حرة
كنتى تتفرمى شطاير
ياسما هزى الدواير
الف رحمة عليه يناير
الف رحمة عليه يناير
تعليقك على فيس بوك
أنشر تعليقك مباشرة على فيس بوك
